അടുത്ത വർഷം മുതൽ, ഫിൻലൻഡിലെ നായ ഉടമകൾ അവരുടെ നായ്ക്കളെ മൈക്രോചിപ്പ് ചെയ്യാനും നായ്ക്കളെ തിരിച്ചറിയാനുള്ള അടയാളങ്ങളോടുകൂടിയ രജിസ്ട്രേഷൻ ചെയ്യാനും നിയമപരമായി ബാധ്യസ്ഥരാകും. അനധികൃത മൃഗക്കടത്ത്, നായ്ക്കുട്ടികളുടെ ക്രമാതീതമായ ഉത്പാദനം, വളർത്തുമൃഗങ്ങളെ ഉപേക്ഷിക്കൽ എന്നിവ തടയാനാണ് ഈ നീക്കംകൊണ്ട് ലക്ഷ്യമിടുന്നത് .
കൃഷി, വനം മന്ത്രാലയത്തിൻ്റെ പുതിയ നിയന്ത്രണത്തിൻ്റെ ഭാഗമായി 2023 ജനുവരി മുതൽ നായ്ക്കളുടെ മൈക്രോ ചിപ്പിംഗും രജിസ്ട്രേഷനും നിർബന്ധമാക്കും. ഫിൻലൻഡിലെ ഓരോ നായയും ഫിന്നിഷ് ഫുഡ് അതോറിറ്റിയുടെ ഡോഗ് രജിസ്റ്ററിൽ ജനുവരി മുതൽ രജിസ്റ്റർ ചെയ്യേണ്ടതുണ്ട്.
2023-ന് മുമ്പ് ജനിച്ച മൃഗങ്ങൾ ഉൾപ്പെടെ എല്ലാ നായ്ക്കൾക്കും രജിസ്ട്രേഷൻ ബാധകമാണ്. നായയ്ക്ക് ഇതുവരെ ഒരു ഐഡന്റിഫിക്കേഷൻ ടാഗ് (മൈക്രോചിപ്പും ഐഡന്റിഫിക്കേഷൻ സർട്ടിഫിക്കറ്റും) ഇല്ലെങ്കിൽ, നായയുടെ ഉടമയ്ക്ക് ഒരു സ്വകാര്യ ഓപ്പറേറ്ററിൽ നിന്ന് നായയുടെ തിരിച്ചറിയൽ ടാഗ് കരസ്ഥമാക്കാവുന്നതാണ്. നായയുടെ പേര്, ജനനത്തീയതി, ഇനം എന്നീ വിവരങ്ങളാകും ചിപ്പിൽ ഉൾപ്പെടുത്തുക. അടുത്ത വർഷം മുതൽ ജനിക്കുന്ന നായ്ക്കുട്ടികൾ ജനിച്ച് മൂന്ന് മാസത്തിനുള്ളിൽ ചിപ്പ് ചെയ്യുകയും രജിസ്റ്റർ ചെയ്യുകയും വേണം. പുതിയ ഉടമകൾക്ക് കൈമാറുന്നതിന് മുമ്പ് അവരുടെ കുഞ്ഞുങ്ങളെ ചിപ്പ് ചെയ്യേണ്ടത് ബ്രീഡർമാരുടെ ഉത്തരവാദിത്തമാണ്.
നായയെ മറ്റാരെങ്കിലും മുമ്പ് രജിസ്റ്റർ ചെയ്തിട്ടുണ്ടെങ്കിലും, നായയുടെ ഉടമ തൻ്റെ നായയെ ഔദ്യോഗിക ഡോഗ് രജിസ്റ്ററിൽ വീണ്ടും രജിസ്റ്റർ ചെയ്യണം. രജിസ്റ്ററിൽ നായ മരിക്കുകയോ കാണാതാവുകയോ മുതലായ വിവരങ്ങൾ സൂക്ഷിക്കുന്നതിനുള്ള ഉത്തരവാദിത്തവും നായയുടെ ഉടമസ്ഥൻ്റെതാണ്.
ഫിൻലാൻഡിൽ ഏകദേശം 700,000 നായ്ക്കൾ ഉള്ളതിൽ വെറ്റിനറി ക്ലിനിക്കുകൾ വഴി ഇതിനകം അര ദശലക്ഷം നായ്ക്കൾക്ക് മൈക്രോ ചിപ്പുകൾ നല്കികഴിഞ്ഞിട്ടുണ്ട്.
https://www.kennelliitto.fi/koirat
https://turvasiru.fi/?lang=en