ചൈനയിൽ നിന്ന് വായ്പയെടുത്ത രണ്ട് പാണ്ടകളുടെ ആവാസ കേന്ദ്രമായ ആഹ്തരി മൃഗശാലയുടെ ബോർഡ്, സൗകര്യങ്ങളുടെ അഭാവം കാരണം അപൂർവ മൃഗങ്ങളെ ചൈനയിലേക്ക് തിരിച്ചയക്കണമെന്ന തീരുമാനത്തിലെത്തിചേർന്നു.

പാണ്ടകളെ പരിപാലിക്കാൻ പ്രതിവർഷം ചെലവാകുന്ന ഏകദേശം 1.5 ദശലക്ഷം യൂറോ ടിക്കറ്റ് വിൽപ്പന വരുമാനത്തിൽ നിന്ന് ലഭിക്കാത്തതിനാൽ പാണ്ടകളുടെ പരിപാലനത്തിനായി മൃഗശാല കുറച്ചുകാലമായി ബുദ്ധിമുട്ടുന്നു.

മൃഗശാലയിലെ പാണ്ടകളുടെ പരിപാലനച്ചെലവുകൾക്കായി അഞ്ച് ദശലക്ഷം യൂറോ നീക്കിവെക്കാനുള്ള ഹ്രസ്വകാല പദ്ധതികളുമായി മന്ത്രാലയം മുന്നോട്ട് പോകുന്നില്ലെന്ന് കൃഷി മന്ത്രി ആൻതി കുർവിനെൻ ബുധനാഴ്ച പ്രഖ്യാപിച്ചിരുന്നു.

2018 ലാണ് ലൂമി, പ്യുറു എന്ന് പേരിട്ടിരിക്കുന്ന പാണ്ടകൾ ഫിൻലാൻഡിലെത്തിയത്. 2021-ൽ, ഫിൻലാൻഡ് ഗവൺമെൻറ്റ് പാണ്ടകളെ പരിപാലിക്കാനായി മൃഗശാലയ്ക്ക് 200,000 യൂറോ നൽകിയിരുന്നു. വീണ്ടും 5 ദശലക്ഷം യൂറോ ഗ്രാൻറ്റിനുള്ള പുതിയ അപേക്ഷ മന്ത്രാലയം നിരസിച്ചു .

വംശനാശഭീഷണി നേരിടുന്ന ഫിൻലാൻഡിലെ ജീവജാലങ്ങളെ സംരക്ഷിക്കാൻ രാജ്യം പ്രതിവർഷം ചെലവഴിക്കുന്ന തുകയേക്കാൾ കൂടുതലാണ് പണ്ടകൾക്കായി ചിലവഴിക്കുന്ന തുകയെന്ന് എംപിമാർ ചൂണ്ടിക്കാട്ടിയതിനെ തുടർന്നാണ് ഗ്രാൻറ്റ് നിരസിക്കാൻ തീരുമാനിച്ചത്.

പാണ്ടകളെ ചൈനയിലേക്ക് തിരിച്ചയക്കണോ വേണ്ടയോ എന്ന കാര്യത്തിൽ ഫെബ്രുവരി 28ന് അന്തിമ തീരുമാനമുണ്ടാകുമെന്ന് മൃഗശാല അറിയിച്ചു.