രണ്ട് അതിവേഗ തീവണ്ടി സേവനങ്ങൾക്കായുള്ള പദ്ധതി സ്വീഡൻ സർക്കാർ നിർത്തിവച്ചു. ഇതിനായുള്ള നിർദേശം സ്വീഡിഷ് ട്രാൻസ്‌പോർട്ട് അഡ്മിനിസ്ട്രേഷന് നൽകിയതായി സർക്കാർ അറിയിച്ചു. നിർത്തിവയ്ക്കപ്പെട്ട പദ്ധതികളിൽ ഒന്ന് ഗോഥൻബെർഗും ബുറോസും (Boräs) തമ്മിൽ ബന്ധിപ്പിക്കുന്നതും മറ്റൊന്ന് യാൻഷേപിങ്ങും (Jönköping) ഹാസ്ലെഹോമും(Hässleholm) തമ്മിൽ ബന്ധിപ്പിക്കുന്നതുമാണ്.
“ജോലി സാധ്യതകളും സാമ്പത്തികവളർച്ചയും പ്രോത്സാഹിപ്പിക്കാൻ തീവണ്ടി ഗതാഗത സംവിധാനത്തിൽ നിക്ഷേപം നടത്തി യാത്രയും ചരക്ക് ഗതാഗതവും എളുപ്പമാക്കാൻ സർക്കാർ ആഗ്രഹിക്കുന്നു. തീവണ്ടി ഗതാഗതത്തിലുള്ള നിക്ഷേപങ്ങൾ നിലവിലെ പദ്ധതിയെക്കാൾ കുറേക്കൂടി സാമ്പത്തികമായി ഫലപ്രദമാവണം എന്നതാണ് സർക്കാർ സമീപനം.” ഇൻഫ്രാസ്ട്രക്ചർ മന്ത്രി ആൻഡ്രിയാസ് കാൾസൺ ഒരു പത്രക്കുറിപ്പിൽ പറഞ്ഞു.
ഈ തീരുമാനത്തെ ബുരോസ്‌ മേയർ ഉൾഫ് ഓൾസൺ എതിർത്തു. “സ്വീഡനിലെ ഏറ്റവും വേഗത കുറഞ്ഞ റയിൽവേയാണ് ഇപ്പോൾ ഇവിടെ ഉള്ളത്. അതിനാൽ നിലവിലുള്ള റെയിൽവേയിൽ തുടരാൻ ശ്രമിക്കുന്നത് യാഥാർഥ്യബോധത്തോടെയുള്ള സമീപനമല്ല.” അദ്ദേഹം പറഞ്ഞു. “ഇതു സ്വീഡനിലെ മൂന്നാമത്തെ വലിയ യാത്രാ മേഖലയാണ്. പ്രവർത്തനക്ഷമമായ ഒരു റെയിൽ സംവിധാനം ഇവിടെയില്ല.” സതേൺ സ്വീഡൻ ചേംബർ ഓഫ് കൊമേഴ്‌സിന്റെ ഡെപ്യൂട്ടി ചീഫ് എക്‌സിക്യൂട്ടീവ് പെർ ട്രൈഡിംഗ് പരാതിപ്പെട്ടു. “ഈ തീരുമാനം മൂലം സ്വീഡനിലെ ഏറ്റവും തെക്കൻ കൗണ്ടിയായ സ്കോന്നെയിൽ (Skåne) റെയിൽ അടിസ്ഥാന സൗകര്യ വികസന പദ്ധതികളൊന്നും നിലവിലില്ല. ഇപ്പോൾ സ്കോന്നെയിലെ ഏക വലിയ നിക്ഷേപം അപ്രത്യക്ഷമാകുന്നു. സ്കോന്നെ ഇപ്പോൾത്തന്നെ ഗോഥൻബർഗിനും സ്റ്റോക്ക്‌ഹോമിനും വളരെ പിന്നിലാണ്.” അദ്ദേഹം പറഞ്ഞു. “ഇത് പ്രശ്നങ്ങളിലേക്ക് നയിക്കും. ഒടുവിൽ എന്ത് തീരുമാനമെടുത്താലും ഇതിന് വളരെയധികം സമയമെടുക്കുമെന്ന് ഉറപ്പാണ്. കൃത്യമായ വിശകലനത്തിന് ശേഷം വേണമെങ്കിൽ പദ്ധതികൾ നിർത്തിവയ്ക്കുന്നതിനു പകരം പദ്ധതികൾ നിർത്തലാക്കിയതിനു ശേഷം ഭാവി സംവിധാനങ്ങളെക്കുറിച്ചു വിശകലനത്തിലേക്കു കടക്കുന്നത് വളരെ വിചിത്രമാണ്.”
അതേസമയം നിലവിലുള്ള റെയിൽ ശൃംഖല, മെച്ചപ്പെട്ട റോഡ് നിലവാരം, ചാർജിംഗ് ഇൻഫ്രാസ്ട്രക്ചർ എന്നിവയുടെ നിർമ്മാണത്തിനാണ് സർക്കാർ മുൻഗണന നൽകുന്നതെന്ന് മന്ത്രി കാൾസൺ പറഞ്ഞു.
