ഫിന്നിഷ് ഇമിഗ്രേഷൻ സർവീസായ മൈഗ്രി മാനേജ്‌മെന്റ് തസ്തികകളിൽ ജോലി ചെയ്യുന്നതിനായി ഫിൻലൻഡിലേക്ക് വരാൻ ശ്രമിക്കുന്നവർക്ക് ‘ഫാസ്റ്റ് ട്രാക്ക്’ റെസിഡൻസ് പെർമിറ്റ് പദ്ധതി പ്രഖ്യാപിച്ചു. ഇത് വിദേശത്ത് നിന്ന് മാനേജർമാരെ ജോലിക്കെടുക്കാൻ ഫിന്നിഷ് കമ്പനികളെ പ്രോത്സാഹിപ്പിച്ചേക്കാം.
മാനേജ്‌മെന്റ് തസ്തികകളിൽ ജോലി ചെയ്യുന്നതിനായി പ്രതിവർഷം 40-ൽ താഴെ ആളുകൾ റസിഡൻസ് പെർമിറ്റിന് അപേക്ഷിക്കുന്നുണ്ടെന്ന് മൈഗ്രിയുടെ കണക്ക്.
അപേക്ഷകൻ ഒരു ഇലക്ട്രോണിക് അപേക്ഷ സമർപ്പിക്കുകയും പ്രോസസിംഗ് ഫീസ് മുൻകൂറായി അടക്കുകയും വേണം. ഒരു നിശ്ചിത സമയപരിധിക്കുള്ളിൽ അടുത്തുള്ള ഫിന്നിഷ് നയതന്ത്ര കാര്യാലയത്തിലോ അംഗീകൃതമായ സേവനദാതാവിൻ്റെ കാര്യാലയത്തിലോ നേരിട്ട് ഹാജരായി തിരിച്ചറിയൽ രേഖകൾ സമർപ്പിക്കേണ്ടതാണ്.
ഡിസംബർ 22 വ്യാഴാഴ്ച മുതൽ, മാനേജർമാർക്കും അവരുടെ കുടുംബങ്ങൾക്കും 14 ദിവസത്തിനുള്ളിൽ പെർമിറ്റുകൾ അനുവദിക്കാൻ ഏജൻസി ലക്ഷ്യമിടുന്നു.
ഐ.ടി. മേഖലകളിൽ വിദഗ്ദ്ധ തൊഴിലാളികൾക്കുള്ള റെസിഡൻസ് പെർമിറ്റുകൾ ഫാസ്റ്റ് ട്രാക്ക് സമ്പ്രദായം കഴിഞ്ഞ വർഷം ആരംഭിച്ചിരുന്നു. ഇപ്പോൾ ഇത് മാനേജ്‌മന്റ് തസ്തികകൾക്കുകൂടി വ്യാപിപ്പിച്ചിരിക്കുകയാണ്.
