നോർവേയിലെ ഏറ്റവും വലിയ ചലച്ചിത്രമേളയായ ത്രുംസ ഇൻറ്റർനാഷണൽ ഫിലിം ഫെസ്റ്റിവൽ (TIFF) ജനുവരി മൂന്നാം വാരത്തിൽ നോർവേയിലെ ത്രുംസയിൽ നടക്കുന്ന വാർഷിക ചലച്ചിത്രമേളയാണ്. ഈ വർഷം ജനുവരി 16 മുതൽ 22 വരെയാണ് ചലച്ചിത്രമേള നടന്നത്
നോർവേയിലെ ഏറ്റവും വലിയ ഫിലിം ഫെസ്റ്റിവലായ TIFF വടക്കൻ മേഖലയിലെ സിനിമ വ്യവസായത്തിൻ്റെ പ്രധാന സംഗമ സ്ഥലമാണ്. 1991 ൽ ആരംഭിച്ച ഫിലിം ഫെസ്റ്റിവലിലേക്കുള്ള പ്രവേശനം 5,000-ൽ തുടങ്ങി ഈ വർഷം 60,000 വരെയായി വർദ്ധിച്ചു. ഊലെ യാവേറിൻ്റെ ‘ലെറ്റ് ദ റിവർ ഫ്ലോ’യുടെ ലോക പ്രീമിയറോടെയാണ് ഫെസ്റ്റിവൽ ആരംഭിച്ചത്.
സാറാ പോളിയുടെ ‘വുമൺ ടോക്കിങ്ങി’ന് ഫെയ്ത്ത് ഇൻ ഫിലിം അവാർഡും അറോറ പുരസ്കാരവും ലഭിച്ചു. മറിയം തൗസാനിയുടെ ‘ദി ബ്ലൂ കഫ്താൻ’ നാണ് ഡോൺ ക്വിക്സോ പുരസ്കാരം. നോർവീജിയൻ പീസ് ഫിലിം പ്രൈസ് അലോൺ ഷ്വാർസിൻ്റെ ‘തൻതുറ’ ക്ക് ലഭിച്ചു.
എല്ലാ ജനുവരിയിലും നടത്തുന്ന ചലച്ചിത്രമേളയ്ക്ക് പുറമേ TIFF വർഷം മുഴുവൻ സിനിമ പ്രവർത്തങ്ങൾ നടത്തുന്നുണ്ട്. സിനിമയെക്കുറിച്ചുള്ള ധാരണയും അറിവും വർദ്ധിപ്പിക്കുന്നതിനും ഒരു പ്രധാന സാംസ്കാരിക ഘടകമായി സിനിമയെ ഉയർത്തുന്നതിനുമായാണ് TIFF പ്രവർത്തിക്കുന്നത് .
ഏപ്രിലിൽ സൈലൻറ്റ് ഫിലിം ഡേയ്സും ശരത്കാലത്തിൽ കുട്ടികളുടെ ചലച്ചിത്രമേളയും സംഘടിപ്പിക്കുന്നു. ഇത് കൂടാതെ വർഷം മുഴുവനും സ്കൂൾ കുട്ടികൾക്കായി സിനിമകൾ പ്രദർശിപ്പിക്കുന്നു. TIFF ൻ്റെ 34-ാം പതിപ്പ് 2024 ജനുവരി 15-21 തീയതികളിൽ നടക്കും.
You are here